Owais Razvi Qadri Siddiqui
Sufi Singer

مجھے بھی دائمی مسکن مدینے میں عطا کردے

1,974

مجھے بھی دائمی مسکن مدینے میں عطا کردے

 عرض نمودہ: ڈاکٹر محمد حسین مُشاہدؔ رضوی

سبھی عاداتِ بد مجھ سے خداوندا جدا کردے
دُرود و نعت ہی یارب وظیفہ تُو مرا کردے

مکینِ گنبدِ خضرا کے صدقے میں خداوندا
مجھے بھی دائمی مسکن مدینے میں عطا کردے

نہ مل پائے پتا مجھ کو خدایا خود مجھے میرا
شہ کونین کی الفت میں یوں مجھ کو فنا کردے

برائی سے بچوں مولیٰ، چلوں میں نیک رستے پر
عطا سنت پہ چلنے کا سلیقہ یاخدا کردے

طبیبِ دوجہاں صل علیٰ کا واسطہ مولا
گناہوں کی نُحوست سے مجھے فورًا رہا کردے

تُو ہے ستّار عیبوں کو چھپاتا ہے خداوندا
تُو ہے غفّار ساری در گزر میری خطا کردے

عیاں ہے حالِ زارِ امتِ احمد سبھی تجھ پر
تُو ہے رحمان، رحمت کی خدا سب پر رِدا کردے

زمینِ ہند ہو، ارضِ فَلسطیں ، شام یا برما
غموں کی دھوپ میں تُو سایۂ مِہر و وفا کردے

نہ ہو دنیا سے کچھ رغبت، نہ مال و زر کی ہو خواہش
عطا اپنی رضا کردے، وِلاے مصطفیٰ کردے

طفیلِ دافعِ جملہ بلا ، خیرالوریٰ مولا!
بلاؤں کو تُو میری خود گرفتارِ بلا کردے

عطا کردے تُو شوکت بوذر و سلمان و خالد سی
بلالی سوز دے جذبِ اویسِ با صفا کردے

شہِ برکات* کی برکتِ سے مالا مال ہوجاؤں
جہاں میں خادمِ آلِ رسولِ مقتدا* کردے

ہو نورِ جان و ایماں از پَے نوری میاں* حاصل
عطا مجھ کو خدایا حُبِ آلِ مصطفیٰ کردے

رہے اخترؔ کا بھی سایہ خداوندِ جہاں مجھ پر
عطا مجھ کو خدا فیضِ خلیلِ مصطفیٰ* کردے

مُشاہدؔ کا وظیفہ ہو شہِ کونین کی مدحت
عطا خوشبوے حسّاںؔ کر، عطا سوزِ رضاؔ کردے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
* حضور صاحب البرکات مارہروی قدس سرہٗ

* حضور آلِ رسول احمدي میاں مارہروی قدس سرہٗ

* شاہ ابوالحسین نوری میاں مارہروی قدس سرہٗ

* یہاں اخترؔ سے مراد مرشدی تاج الشریعہ علامہ اختر رضا ازہری میاں قبلہ بھی ہیں اور مرشدِ اجازت حضور شیخ الاسلام سید محمد مدنی میاں قبلہ اخترؔ کچھوچھوی بھی ہیں

* خلیل العلماء مفتی محمد خلیل خاں برکاتی مارہروی قدس سرہٗ

Comments
Loading...